嫲嫲背景介紹

嫲嫲係南丫島第二代水上人，今年71歲，喺船上出世，係八個兄弟姊妹入面最大嘅一個。佢一生經歷過棚屋同船上兩種生活：船上空間好細，八個人共用兩格廁所，瞓係硬木板上，連大小便都係直接倒落海。相比之下，岸上棚屋雖然環境較為穩定，但每次打完風之後，都要重新補修、加固結構，先可以繼續住落去。日常食水要靠水井，用手拉繩抽水上來；照明就用油燈、火水燈、同大光燈，後期先慢慢多咗電筒呢啲工具。

漁民出海其實冇乜固定時間表，通常都要凌晨兩三點就開船，一次可以落到二三十個網，成個捕魚過程往往要花兩三個鐘，體力消耗好大、十分辛苦。只要掛起風球，就唔會出海；早年仲試過遇上龍捲風。嫲嫲自己喺三、四歲時就已經俾大人「扔」落水學游泳，十三歲開始就上岸打工，做過清潔工作，當時日薪只係四蚊，但都係為咗幫補家計。

屋企主要靠捕魚搵食，常見漁獲包括石斑、黃腳鱲、龍蝦等。嫲嫲記得，爸爸以前會特登將較貴嘅海鮮運去中環賣，因為價錢會好啲。捕到嘅魚，一般喺街市賣出，貴價嗰啲就攞去賣，較平嘅就留返自己食。呢幾十年入面，嫲嫲親眼見住漁獲量同魚種一年少過一年，家族入面而家只剩返弟弟一個仲喺南丫島賣魚，純粹因為佢真係鍾意呢份工作，所以一直堅持落去。

嫲嫲一家一直保留住拜天后嘅傳統，出海前都會去祈福保平安。每逢天后誕，大家都要夾錢一齊慶祝，食菜茶、炒糯米飯，場面好熱鬧。索罟灣嘅天后誕農曆四月十八尤其出名，會吸引好多水上人返嚟參與搶花炮，同場有鑼鼓、舞龍舞獅等傳統表演，係漁民信仰同節慶文化最集中的日子。

嫲嫲細個冇機會讀書，不過後來弟妹都有書讀，生活環境慢慢改善。佢先生係「出面人」唔係水上人出身，原先喺廚房做嘢，兩人透過朋友介紹認識。結婚之後，嫲嫲選擇繼續留喺南丫島生活，三個小朋友亦都喺島上讀書長大。雖然而家兄弟姊妹分散喺唔同地方，但大家仲係會定期返南丫島聚一聚。現時嫲嫲生活好有規律：朝早飲茶、打麻雀、凌晨去晨運，亦希望社區可以增加多啲老人聚會地方，畀大家睇大戲，又多啲設施畀細路有地方玩。

嫲嫲爸爸對海洋變化好敏銳，全靠多年的經驗累積，懂得睇流水、判斷天氣，並冇依靠指南針等儀器輔助。呢種對海嘅觀察力，亦默默影響住嫲嫲。佢記得，喺船上生活最怕就係遇到打風落雨，早年甚至親眼見過龍捲風。佢講起從前深水一帶海水清澈見底，跟而家嘅環境變遷形成強烈對比，感觸良多。由「以前窮到冇米食」到如今生活安穩，嫲嫲直言而家嘅日子真係幸福好多。